铁甲威虫后续纹恋爱:铲刀磨铰剪

　　□何凤仪

　　休息喺屋企谂住瞓晏啲，点知一早就畀楼下经过嘅阿伯嘈醒，“铲刀磨铰剪，磨铰剪铲刀……”我谂返起细细个嗰阵时，经常都会听见有人嗌“铲刀磨铰剪”、“补镬补镬”、“整烂风炉补沙煲”……而家呢啲行业都买少见少嘞。

　　以前大家物质比较紧缺嘅时候，磨刀、补沙煲呢啲行业都几兴旺，因为个个用烂嘢都唔舍得掉。随街都可以见到有人自己整个砂轮喺部单车度，脚踏踩下踩下，把刀磨埋个砂轮度就会擦出火花。磨嘅时候好讲究角度同技巧，话都冇咁快，一把钝菜刀又锋利返，新嘅一样啦。

　　沙煲用得耐唔多唔少都会有裂缝，一漏水就肯定要揾箍煲佬帮手嘞。补沙煲其实唔难，用白醋浸好铁砂揩上去补好条裂缝，或者抹啲铜油灰，再用几条铁线箍紧就搞掂嘞。补风炉就更加简单，几条铁线加几块铁片，三两下手势就搞掂。补镬就相对麻烦啲喇，可以话又热又邋遢，起码个炭炉要够猛，先至够温度烧熔啲生铁片，补返个穿窿镬底。

　　佢哋钟意一边行一边嗌，噉先招揽到生意。我哋班细路仔经常喺后面拃乱歌柄，“铲刀磨铰剪……”，我哋就跟住叫“铲烂唔使钱……”、“补镬补镬……越补越烂镬……”、“飞发飞发……越飞越邋遢……”。以前细细个唔懂事，咩都噏一餐，有时激到人哋生虾咁跳，我哋班细路重开心添。

　　随住年代嘅变迁同城市嘅发展，磨刀、补沙煲、修雨遮、修理钢笔等等呢啲兴旺一时嘅传统行业，已经喺现代生活中逐渐淡去。喺“修”同埋“新”面前，大多数人选择咗后者，个煲裂咗一般都系掉咗佢，遮骨断咗都唔会再修理嘞。作为呢部分行业嘅坚守者，佢哋都希望用自己呢份热忱，唤起大家对旧时传统手艺嘅一份回忆。